Şairə Rəfiqə Qasımqızı – Abbasova Rəfiqə Qasım qızı 1954-cü ildə Şəmkir rayonunun Çinarlı qəsəbəsində ziyalı ailəsində doğulub. İxtisasca həkim olan, şairə oxucusunun qəlbinə asanlıqla yol tapa bilir. Təsadüfi deyildir ki, sevilən şairənin şeirləri mütəmadi olaraq dövrü mətbuatda, o cümlədən müvafiq internet saytlarında dərc olunur. İndiyədək onun “Yaşanan ömrümdə yeni ömürsən”, “Payız dodağında oxunan nəğməm”, “İlmələnən arzular”, “Xatirələr əl edir”, “Utancaq bənövşələr” və “Фиалка” (rus dilində) adlı kitabları işıq üzü görüb. O, həmçinin Təbrizdə nəşr olunmuş “Yubanmış sevgi” adlı bir kitabın müəllifidir.
Şairə R.Qasımqızı “İraq-Türkmən Ədəbiyyatçı və Yazarları” birliyinin üzvü,“Qızıl qələm” mükafatı laureatıdır. Vaxtaşırı DQM-nin tədbirlərinə qatılan şairə, həm də bu məclisin üzvü kimi ilk dəfədir ki, bloq-saytımızda çap olunur. Onu münasibətlə təbrik edir, daha çox sevindirici-yaradıcı uğurlara nail olmasını istəyirik! Oxuyaq, dəyər verək, dostlar!
Sayğılarımla: Yusif DİRİLİ
Rəfiqə QASIMQIZI
ÖMÜR
Bir gilə yaş boydamı,
Əlimdən düşən ömür.
Qəm-qüssənin közündə,
Qovrulub bişən ömür.
Qönçə arzularımı,
Fələyə nişan verib.
Bəxtimin kəm yerini,
Küləyə ehsan verib.
Ümidin qığılcımı,
Soyuq dəyir əlimə.
“Son görüm” çox zəifmiş,
Əsir düşüb dilimə.
Taleyimin çəp gözü,
Əyriləri düz görür.
Bəxtimin ağ rəngini,
Dinməz saçıma hörür.
Bütün arzularımı,
Yığıb qızıl qəfəsə
Möhtac qalıbdı özü,
Bir quruca nəfəsə.
Qədərimi bəxtim heç,
Öz boyuma biçmədi.
Ağ görünən şərbəti,
Ağı bilib içmədim.
Daş,kəsəkli ömrümün,
Yolları dağ-dərədi.
Yolumu kəsən qaya.
Sel gətirən bərədi.
SEVGIM CILIZ QALDI
Deyirlər bir sevgi şeiri oxu,
Xatirələr çaş-baş, ayağı üstə.
Qəlbimə iz salan ilk eşqim mənim,
Çoxdan heykəlləşib dönübdü büstə.
Daşlaşmış sevginin nəyindən deyim,
Sığalı, tumarı çıxıb yadımdan.
Heç ilk görüşümüz olubmu bizim,
Yoxsa danışıblar mənim adımdan.
Necə kövrəlibdi xatirələrim,
İslanıb sevgimin al yanaqları.
Sevgim cılız qaldı, heç böyümədi,
Qoymadı boy ata el qınaqları.
Qoynunda bəslədi öz balası tək,
Həsrət sığal çəkdi neçə illərə.
Gizlicə saxladım, qorudum bircə,
Eşqimiz düşməsin yaman dillərə.
İndi heç söhbətə yer də tapılmır,
Saralıb xiffətdən söyüd ağacı.
Dərd-qəmlə, kədərlə yüklənib yaman,
Göstərmir illəri ömür sayğacı.
KÖHNƏ TANIŞ
Üz-üzə gəlmişik illərdən sonra,
Nə sən dinə bildin,nə mən danışa.
Oxşadın bəxtimin taxtından düşən,
Həsrətə bürünmüş köhnə tanışa.
Mənimmi gözlərim dumanlı görür,
Qara tellərinə yoxsa dən düşüb.
Bəxtində göynəyən oxşar taleyim,
Bir alın yazısı bizə tən düşüb.
Həsrət xumarlanır nəmli gözündə,
Vüsalın əlləri uzana qalıb.
Hicran yaxasını çəkib qırağa,
Taleyin bu hökmü susana qalıb
İndi heç söhbətə yer də tapılmır,
Saralıb xiffətdən söyüd ağacı.
Dərd-qəmlə, kədərlə yüklənib yaman,
Göstərmir illəri ömür sayğacı.
ZAMAN ÖTÜR
Zaman ötür yanımdan,
Üzümə baxa-baxa.
Günlər keçir ömrümdən,
Su kimi axa-axa.
Hər axşam ürəyimə,
Gprdüyümü yazıram.
Ömrün dolaylarında,
Hərdən itib, alıram.
Hərdən də öz içimdə,
Boğuluram, ölürəm.
Hərdən gələn dərdimi,
Öz-özümlə bölürəm.
Qurduğum hər xəyalım,
Beynimdəcə boğulur.
Qurtulmaq istəsəm də,
Yeniləri doğulur.
Yorum bırakın
Henüz yorum yapılmamış.
DİRİLİ QURBANİ MƏCLİSİ 
Cavab qoy